Հայաստանը կշարունակի ԵՄ-ի հետ համապարփակ և ընդլայնված գործընկերության համաձայնագիրը՝ որպես աշխատանքային օրակարգ, սակայն այն կիրականացնի առանց շանտաժի գործիքների կիրառման, այդ թվում՝ ԵՄ-ի նկատմամբ։ Այս մասին վարչապետ Նիկոլ Փաշինյանը հայտարարեց Հայաստան-ԵՄ քաղհասարակության պլատֆորմի 8-րդ երկկողմ հանդիպման ընթացքում։

Վարչապետը նշեց, որ Հայաստանն ընդունել է օրենք, որով սկսվում է երկրի անդամակցելու գործընթացը Եվրամիությանը։ Նրա խոսքով՝ մեր ռազմավարությունը նախատեսում է զրո նյարդայնություն այս գործընթացի շուրջ։

«Մենք չենք պատրաստվում շանտաժի գործիքներ կիրառել։ Ո՛չ, ամենևի՛ն։ Մեզ պետք է, որ այս պրոցեսի շուրջ լինի զրո նյարդ, և դա մեզ համար հնարավորություն է իրապես համապատասխանելու որպես երկիր, բարեփոխումների գործընթացը շարունակելու այնպես, որ իսկապես համապատասխանենք ԵՄ չափանիշներին»,- ընդգծեց Նիկոլ Փաշինյանը։

Նա նաև հստակեցրեց, որ ԵՄ-ն կարող է ընդլայնվել կամ չընդլայնվել՝ ելնելով իր քաղաքական որոշումներից։ «Մենք որևէ մեկի քաղաքական կամքին չենք կարող բռնանալ։ Եթե ԵՄ-ն որոշի ընդունել մեզ ԵՄ լիիրավ անդամ, շա՛տ լավ։ Եթե կորոշի չընդունել, մենք էլի շահած դուրս կգանք, որովհետև կլինենք ժամանակակից լավագույն ստանդարտներին համապատասխանող երկիր»,- ասաց վարչապետը։

Նիկոլ Փաշինյանը նշեց, որ Հայաստանի խնդիրն ու նպատակն է լինել լավագույն ստանդարտներին համապատասխանող երկիր, և այս ճանապարհով շարժվելու համար երկիրը ունի անհրաժեշտ քաղաքական կամք, ռազմավարություն և տեսլական։

Վարչապետը կարևորեց ԵՄ-Հայաստան քաղհասարակության պլատֆորմի գործունեությունը՝ որպես այս ճանապարհի կարևորագույն գործիք։