Իսրայելի արտաքին գործերի նախարար Գիդեոն Սաարը Բաքվում իր այցի ընթացքում հայտարարել է, որ Իսրայելը պաղեստինյան կողմին նախկինում զիջումներ է արել, այդ թվում՝ տարածքային, սակայն դրանք չեն հանգեցրել խաղաղության, այլ՝ անվտանգության վիճակի վատթարացման։ Նա պահանջել է, որ Պաղեստինը ապացուցի իր խաղաղության ցանկությունը՝ դադարեցնելով ահաբեկչական գործունեությունը, Իսրայելի դեմ ատելությունը քարոզող ուսումնական ծրագրերը և անօրինական պատերազմը։

Այս հայտարարությունը հիշեցնում է Բաքվի գործողությունները, որոնք, ի տարբերություն Իսրայելի փորձի, ոչ միայն չեն ուղղված խաղաղության հաստատմանը, այլև ակտիվորեն խոչընդոտում են դրան։ Բաքուն ոչ միայն մեծացնում է իր ռազմական բյուջեն և հնարավորությունները, այլև հայ գերիներին անվանում է «ռազմական հանցագործներ», կեղծ դատավարություններ է անցկացնում նրանց նկատմամբ, մանկապարտեզներում և դպրոցներում հայի թշնամու կերպար է ստեղծում, իսկ հայ սպային կացնահարող հանցագործներին շռայլում է պետական կոչումներով։

Այս իրողությունների համատեքստում, «Պրեսսինգ» հաղորդաշարում հարցազրույցի ընթացքում, Հայաստանի հանրապետական կուսակցության Գործադիր մարմնի անդամ, ՀՀ պաշտպանության նախարարի նախկին առաջին տեղակալ Արտակ Զաքարյանը նշել է, որ Բաքվի գործողությունները պետք է դիտարկել ոչ թե որպես «խաբայություն», այլ որպես իսկական վտանգ, որը պահանջում է զգոնություն և պատրաստվածություն։ Նրա խոսքով՝ աշխարհը զինվում է, և Հայաստանը չի կարող թույլ տալ, որ իր անվտանգությունը դառնա զոհ իրավիճակի հանդեպ անտեսողական վերաբերմունքի։

Հարցազրույցի ընթացքում քննարկվել են նաև 2026 թվականի խորհրդարանական ընտրություններին ընդդիմադիր ուժերի հնարավոր գործողությունները, ինչպես նաև Իսրայելի փորձի և Բաքվի գործողությունների միջև առկա հիմնարար տարբերությունները։