Հայ ժողովուրդը կանգնած է ճամփաբաժանի առջև, որտեղից կամ կառաջնորդվի դեպի ազգային համախմբում և պետականության պահպանում, կամ կընկնի թուրք-ադրբեջանական վասալ դառնալու և պետականություն կորցնելու ճանապարհը։ Այս կարծիքը հայտնեց «ՀայաՔվե» ազգային-քաղաքացիական միավորման անդամ, միջազգայնագետ Մենուա Սողոմոնյանը՝ խոսելով սպասվող մարտահրավերների մասին։

Իր խոսքով՝ աշխարհակարգը փլուզվել է, և միջազգային իրավունքն այլևս չի գործում։ Այս պայթյունավտանգ իրավիճակում, նրա համոզմամբ, իշխանությունները պետք է առաջնահերթություն տային հասարակության համախմբմանը, ինչը, սակայն, հակառակ է տեղի ունենում։

«Աշխարհն անորոշությունների փուլում է, և երբ տեսնում ես, որ գլխիդ սպառնալիքներ կան, բանական մարդը մտածում է, որ պետք է ամբողջ հանրության ներուժով կառուցվի միասնականություն։ Եթե այդ սպառնալիքները կյանքի կոչվեն, այլևս կլինեն հարցեր՝ ո՞ր ճամփարից ես, ո՞ւմ հետ ես։ Պետք է համախմբման օրակարգ լինի, բայց տեսնում ենք ընդհակառակը»,- նշեց Սողոմոնյանը՝ մեկնաբանելով վարչապետ Նիկոլ Փաշինյանի վերջին հայտարարությունները, որոնք, նրա խոսքով, կոչ են արել կրոնական հիմքով բախումներ հրահրել։

Միջազգայնագետը նաև անդրադարձավ վարչապետի և 10 եպիսկոպոսների հունվարի 4-ի հանդիպմանը և հունվարի 6-ին տեղի ունեցած «ուխտերթին»։ Նա նշեց, որ այս գործողությունները Սահմանադրության կոպտագույն խախտում են, քանի որ Փաշինյանը, իր հայտարարություններով, փաստացի սահմանադրական ճշգրիտորեն սահմանված պետություն-եկեղեցի բաժանման սկզբունքը ոտնահարում է։

«Այն, որ Փաշինյանը շատ վաղուց ոտնատակ է տվել ՀՀ Սահմանադրությունը, բոլորին է հայտնի։ Նա ասում է՝ պետությունն ու եկեղեցին մեկն են, ինչը Սահմանադրության ուղիղ խախտում է։ Օրինակ, ասում է. «Գնացեք, մտեք եկեղեցի և պահանջեք պատարագիչներից զեղչել կաթողիկոսի անունը»։ Սա կրոնական կազմակերպության ազատության խախտում է»,- ընդգծեց Սողոմոնյանը՝ հավելելով, որ եկեղեցին պետք է պատասխան տա այս օրակարգին։

Նրա կարծիքով՝ եթե իշխանությունները ցանկանում են հայտարարել որևէ հակապետական գործունեություն, պետք է ամբողջությամբ բացահայտել իրենց մտադրությունները, այլ ոչ թե կիսատեղի հայտարարություններ անել։ «Եթե դու պետական պաշտոնյա ես, քո հայտարարությունը ՀՀ անունից է։ Եթե ինչ-որ մի անձի վերագրում ես հակապետական գործունեություն, պարտավոր ես ամեն ինչ ամբողջությամբ ասել»,- նշեց նա՝ որպես օրինակ բերելով Ռուսաստանի նախագահ Վլադիմիր Պուտինին։

Միջազգայնագետը համոզված է, որ այս իրավիճակից դուրս գալու միակ ճանապարհում ընտրական գործընթացին մեծ թվով մարդկանց մասնակցությունն է։