Ռուսաստանի Անվտանգության խորհրդի քարտուղարի տեղակալ Ալեքսեյ Շևցովը հայտարարել է, որ Հայաստանը, եթե միանա Եվրոպական միությանը, կկորցնի իր համախառն ներքին արդյունքի (ՀՆԱ) մոտ 23 տոկոսը։

Ըստ նրա՝ ԵՄ-ին անդամակցելը Հայաստանին կնշանակի ՀՆԱ-ի զգալի կորուստ։ Նա նաև նշել է, որ աշխատաշուկայում կկատարվի զանգվածային կրճատում՝ 10.5 տոկոսային կետով, իսկ գնաճը կաճի 22.6 տոկոսային կետով, ինչը կհանգեցնի բնակչության կենսամակարդակի զգալի անկման։

Շևցովի խոսքով՝ ներքին սպառումը կնվազի ավելի քան 20 տոկոսով՝ համեմատած ներկայիս մակարդակի հետ։ Ընդհանուր առմամբ, նա նշել է, որ ԵՄ-ին անդամակցությունը, ամենահամեստ գնահատականներով, Հայաստանին կնշանակի ֆինանսական և սոցիալ-տնտեսական բարդ իրավիճակ։ Կարելի է նաև ակնկալել էներգակիրների, այդ թվում՝ բնական գազի գների հետագա աճ։

Այս հայտարարությունը տարածվել է Ռուսաստանի Անվտանգության խորհրդի մամուլի ծառայության կողմից։